YIMANI MI TIVA LESWAKU NDZI XIKWEMBU

John Main OSB (1926-1982) u pfurile Senthara yo Tikambela ka Vakriste yosungula hi 1975 evunghwendzeni bya yena eLondon. U pfuxete ndhavuko wo olova wo miyela, lowu ku nga xikhongelo xo tikambela ku suka eka tidyondzo ta tinghwendza ta khale, Vatatana va le Mananga. A swi ri erivaleni eka yena leswaku ndhavuko lowu a wu fambelana na masiku ya namuntlha ku nga ri na tinghwendza ntsena. A swi vona swi ri ndlela yo pfuxeta kereke na misava. 

Ku tikambela swa olova no koteka. Swi vulavula hi ntokoto ku nga ri miehleketo ntsena; ndlela yo hanya ku nga ri ndlela yo ehleketa. Hikwalaho ka nsusumeto wukulu lowu ku tikambela ku nga na wona evuton’wini bya munhu ku endla leswaku ku hundza ku va ndlela yo khongela; ku va ndlela ya vutomi leyi humaka endzeni ka xiviri xa munhu eka swiyimo hinkwaswo.

 Mpakaniso wo tikambela wa Mukriste i Kriste. Leswi swi vula leswaku wu simekiwile eka xikhongelo xa Kriste lexi yaka emahlweni hi ku tirhisa Moya lowo Kwetsima endzeni ka xiviri xa munhu. Swilo leswi enteke leswi hundzaka miehleketo hinkwayo i Xikwembu hi xoxe. Swilo leswi hundzaka ku tikambela i xiviri xa Xikwembu. Kutani hi ndlela leyi xikhongelo lexi tengeke xi endla leswaku hi hundza eka ku ehleketa hi swilo hinkwaswo, marito na swifaniso leswaku hi “kota ku veka miehleketo ya hina eka Mfumo wa Xikwembu ematshan’wini ya swilo hinkwaswo.” Hi ndlela leyi, hi tshika vutitwi bya hina kutani hi fa no pfuka hi xiviri xa hina eka Kriste.

Ku tikambela i mhaka leyi kayivelaka eka vutomi bya Vakriste bya namuntlha. A yi siyi ehandle tinxaka tin’wana ta xikhongelo kambe yi dzikisa nxiximo wa matsalwa na bibele.” LAURENCE FREEMAN OSB

“Yimani mi tiva leswaku ndzi Xikwembu”

Ku tikambela swi fana na ku yingisela moya na miri. Handle ko kanganyisiwa hi swilo swo tala swa masiku lama hi hanyaka eka wona, ku miyela loku ka koteka eka vanhu ni namuntlha. Kambe loko hi lava ku fikelela ku miyela loku hi fanele hi tinyika nkarhi wo miyela.

“KU VULAVULA NA KU DYONDZISA KU TIKAMBELA TANIHI LAHA HI DYONDZISIWEKE HI KONA HI JOHN MAIN, EKA NDHAVUKO WA XIKRISTE, HI MOYA WO TISA KU NTWANANO EKA VANHU HINKWAVO.”          

Nhlamuselo ya Xikongomelo ya WCCM.

Hi endla ntirho lowu hi ku tlhokovetsela xivulwana xo koma kumbe rito ra xikhongelo leri namuntlha ri tivekaka tanihi mantra. Mantra i ndlela yo olova yo tala hi ripfumelo ro hundzula miehleketo ya hina leswaku hi hundza eka vumunhu bya hina, i ndlela yo hi humesa eka miehleketo na swivilelo swa hina. Endlelo leri ra ku anakanya ri endla leswaku ku va ni ntwanano wa miri, miehleketo na moya.

Lexi hi xona xikongomelo xa Matsalwa xa: “ Yimani mi tiva leswaku ndzi Xikwembu”. Loko hi tikambela hi langutela eka ku lavisisa vutitwi bya hina. A hi ehleketi no vulavula hi Xikwembu. Hi ringeta ku endla swilo swokarhi swa xiyimo xa le henhla: hi ringeta ku va ni Xikwembu, ku va hi va ni miehleketo ya Kriste. Hi hundza eka miehleketo, na hambi ku ri miehleketo yo kwetsima. Ku tikambela a ku vulavula hi ku ehleketa kambe hi xiviri xa hina. Xikongomelo xa xikhongelo xa Xikriste xa hina i ku pfumelela masingita ya Xikwembu na vukona byo va hi miyerile lebyi nga kona eka hina leswaku byi hetiseka endzeni ka hina leswi nyikaka nhlamuselo, xivumbeko na xikongomelo xa swilo hinkwaswo leswi hi nga xiswona ni leswi hi swi endlaka. Ntirho wosungula wa ku tikambela, i ku vuyisa miehleketo ya hina leyi kavanyetiweke leswaku yi yingisa ku miyela, na ku olova.

Vuendzela-vukhongeri bya Xikhongelo

Ku tikambela i ku endzela vukhongeri loku kongomaka eka senthara ya wena, embilwini ya wena. Ku tiva ndlela leyi swi olovaka hi yona swi vula ku dyondza dyondzo yokarhi. Hikwalaho hi lava ripfumelo leswaku hi hundzuka vana. Loko hi ri na ripfumelo na ku tiyisela ku tikambela ku endla leswaku hi va lava rhuleke hi ku hetiseka. Hi le ku rhuleni loku laha hi tivaka swihundla swa Xikwembu. Xirhambo xa xikhongelo xa Mukriste i ku herisa xiviri xa hina no hlangana na Xikwembu. Hinkwerhu ka hina hi vitaniwile leswaku hi fikelela xikongomelo lexi hikuva hi kona ku hetiseka ka vutomi.

Hi lava ntsena ku titsongahata leswaku hi tolovela leswi hi ku tshemba leswaku miehleketo ya Kriste yi va ntokoto wa masungulo ya vutomi bya hina hinkwabyo.

Ku tikambela hi leswi Vakriste va khale a va swi vula “xikhongelo xo tenga”. I nyiko ya nkoka leyi hi faneleke ku yi dyondza hi ku famba ka nkarhi. Loko ha ha sungula a hi nge yi twisisi hi ku hetiseka. Kasi nkarhi wun’wana na wun’wana loko hi tikambela hi va lava hetisekeke. Hikuva swi endla leswaku hi rhandza ntumbuluko wa hina, swi endla leswaku hi va vanhu lava nga na rirhandzu eka vuxaka bya hina hinkwabyo. Ku tikambela i masungulo ya mahanyelo ya kahle na ku hlayiseka ka hina.

Namuntlha swi lava hi pfuxelela xiphemu xa nkoka xa vutomi lexi kombisaka ku rhula loku nga kona eka vutomi bya hina hi xihatla. Kutani leswi swi ta va ntolovelo wa masiku hinkwawo wa ku tikambela ka hina. Loko hi ri vanhu vo rhula, ku tikambela ku ta pfuna vanhu hinkwavo.